თბილისის მერიის ინფორმაციით, უხვმა ნალექმა თბილისში სხვადასხვა დაზიანებები გამოიწვია. კერძოდ კი, ბოლო 24 საათის განმავლობაში ხეების მასიური წაქცევის შემთხვევებს ჰქონდა ადგილი, რამაც ელექტროგადამცემი ხაზები, გარე განათების ბოძები, ავტომანქანები, დააზიანა და ჩახერგა გზები.

როგორც დედაქალაქის მერიის მიერ გავრცელებულ ინფორმაციაშია აღნიშნული, განსაკუთრებული საფრთხის შემცველია ხეების ქვეშ გადაადგილება.

„დედაქალაქში მოსულმა უხვმა ნალექმა პრობლემები გამოიწვია, დაზიანებულია ქალაქის ინფრასტრუქტურა, წაქცეულია ელექტროგადამცემი ანძები თბილისის რამდენიმე ლოკაციაზე. განსაკუთრებით საყურადღებოა, მძიმე და სველი თოვლის გამო ხის ტოტების მტვრევის და ხეების წაქცევის ფაქტები. აღნიშნული მიზეზით, განსაკუთრებით სახიფათოა ხეების ქვეშ გადაადგილება. ბოლო 24 საათის განმავლობაში ადგილი ჰქონდა ხეების მასიური წაქცევის შემთხვევებს, რამაც დააზიანა ელექტროგადამცემი ხაზები, გარე განათების ბოძები, ავტომანქანები, ჩახერგა გზები. სხვადასხვა მისამართზე გაწყვეტილია ინტერნეტების სადენები, რის აღსადგენადაც პროვაიდერი კომპანიები აქტიურად მუშაობენ.

ინფორმაციის მიღებისთანავე ხდება მყისიერი რეაგირება, თბილისის „ეკოსერვის ჯგუფი" და რაიონების გამგეობების ბრიგადები მუშაობენ 24-საათიან რეჟიმში, რათა გზები გაიწმინდოს და პრობლემები აღმოიფხვრას.

აქვე, მადლობას ვუხდით შინაგან საქმეთა სამინისტროს თანამშრომლობისთვის და ოპერატიული მოქმედებისთვის“, - ნათქვამია ინფორმაციაში.