მერაბ ჯანგველაძესთან [ე.წ. კანონიერი ქურდი] თავისთავად ცხადია, მქონდა მკვლელობაზე საუბარი, თუმცა, მას ჩემთან პოზიცია არ დაუფიქსირებია. გამოძიების დეტალებით არ ინტერესდება, - ამის შესახებ მოკლული ბიზნესმენის, ლევან ჯანგველაძის მეგობარმა, კოკა მორგოშიამ სასამართლოში განაცხადა.

როგორც მან განმარტა, მერაბ ჯანგველაძე მისი ძმის მკვლელობის საქმეზე არ საუბრობს, თუმცა, სოციალურ ქსელებსა და მედიაში გავრცელებული ვერსიების შესახებ იცის.

„მერაბ ჯანგველაძესთან ხშირად მქონდა ურთიერთობა და ამას არც ვმალავ, ჩავდივარ ხოლმე ევროპაში მასთან. უფრო ხშირად დავდიოდი ლევანის მკვლელობამდე.

იმ ვერსიებზე, რაც მუსირებს, იცის. ვინ რა შუაშია, ამაზე მე და მერაბს საუბარი არ გვქონია“, - განაცხადა მორგოშიამ.

დაცვის მხარემ მორგოშიას ოთარ ფარცხალაძე-რომანოვისა და ჯანგველაძის დაპირისპირების შესახებ ჰკითხა. მოწმემ იქამდე ჩვენებაში განმარტა, რომ ყოფილ გენერალურ პროკურორსა და ლევან ჯანგველაძეს კონფლიქტი სიგარეტისა და გადაზიდვის ბიზნესთან დაკავშირებით ჰქონდათ.

როგორც მორგოშიამ განმარტა, სიგარეტის და „ვალდბერისის“ ბიზნესის გარშემო მათ უკმაყოფილება, სხვის გამო მოუვიდათ.

ადვოკატის კითხვაზე, თუკი ჯანგველაძეს საქართველოში ბიზნესის არ ჰქონდა, ეს გადაზიდვების ბიზნესი სად უნდა გადაკვეთილიყო, მორგოშიამ უპასუხა, რომ ეს კვეთა საქართველოში არ მომხდარა.

„ლევანს თავისთვის არ სჭირდებოდა, თავის ახლობლებს უშუამდგომლა, რადგან მას მიმართეს, რომ ეს ფარცხალაძის მიმართულება იყო და დახმარებოდა. მაშინ ფარცხალაძემ ლევანს უთხრა, მე ინტერესი არ მაქვს ახლობლებს ვეხმარებიო. ჯანგველაძემ უთხრა, თუ ინტერესი არ გაქვს, დაეხმარე ჩემს ახლობლებს და პირიქით, შენ მოგცემენ მოგების ნაწილსო. ლევანი ნაწყენი და გაბრაზებული იყო ამაზე, მოვილაპარაკეთ, რამდენიმე თვე ვიარეთ და მერე ტყუილი აღმოჩნდაო. ასევე იყო "ვალდებერისის" თემა...

მესამე, მირცხულავას თემა, სხვისი საკითხი იყო, ახლობლისგან მივიდა ლევანთან, რომ ფარცხალაძესთან ეშუამდგომლა. ფარცხალაძემ ჯანგველაძეს უთხრა, მე არაფერ შუაში ვარო და გაირკვა, რომ შუაში იყო“, - განაცხადა მორგოშიამ.

ცნობისთვის, გამოძიება ძმებ გიორგი და დავით მიქაძეებს, ასევე გიორგი ჯოხაძეს ლევან ჯანგველაძის შეკვეთით მკვლელობის ორგანიზებას ედავება.

გიორგი ჯოხაძეს ასევე, გიორგი კაჭკაჭაშვილთან ერთად მართლსაწინააღმდეგოდ ჯგუფურად ცეცხლსასროლი იარაღების შეძენას ედავებიან.

ბიზნესმენ ლევან ჯანგველაძის შეკვეთითა და ანგარებით, განზრახ მკვლელობისთვის და გია ჩადუნელის მკვლელობის მცდელობისთვის მსჯავრდებულია გელა უძილაური. მას უვადო თავისუფლების აღკვეთა აქვს მისჯილი. აღნიშნული საქმის ფარგლებში ცეცხლსასროლი იარაღის მართლსაწინააღმდეგოდ გასაღების ფაქტზე მსჯავრდებულია სანდრო წივწივაძე, მას 8 წლით თავისუფლების აღკვეთა აქვს მისჯილი.

ამავე საქმის ფარგლებში ბრალდებულია ყოფილი გენერალური პროკურორი, ოთარ რომანოვ-ფარცხალაძე. მას ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარუდგინეს, რაც შეკვეთით და ანგარებით განზრახ მკვლელობის ორგანიზებას გულისხმობს.

აღნიშნული დანაშაული სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.

ოთარ რომანოვ- ფარცხალაძე რუსეთის მოქალაქეა, მის მიმართ საერთაშორისო ძებნაა გამოცხადებული.