ისრაელის ტრანსპორტისა და საგზაო უსაფრთხოების მინისტრი, მირი რეგევი საქართველოს ეკონომიკისა და მდგრადი განვითარების მინისტრს, მარიამ ქვრივიშვილს სრულიად საქართველოს კათოლიკოს-პატრიარქის ილია II-ის გარდაცვალების გამო უსამძიმრებს.

ამის შესახებ ინფორამციას ეკონომიკისა და მდგრადი განვითარების სამინსიტრო ავრცელებს.

მათივე ცნობით, ოფიციალურ მიმართვაში ისრაელის მხარე ღრმა მწუხარებას გამოთქვამს და ყურადღებას ამახვილებს ილია II-ის სულიერ მემკვიდრეობასა და ებრაელ ხალხთან მის მეგობრულ დამოკიდებულებაზე.

ოფიციალურ წერილში ილია II მოხსენიებულია, როგორც გამორჩეული სულიერი ლიდერი და ქართულ-ებრაული ურთიერთობების განმტკიცებაში მნიშვნელოვანი როლის მქონე ფიგურა.

„ისრაელის სახელმწიფოს ტრანსპორტისა და საგზაო უსაფრთხოების სამინისტროს სახელით მსურს სამძიმარი გამოგიცხადოთ თქვენ, საქართველოს მთავრობასა და ქართველ ხალხს სრულიად საქართველოს კათოლიკოს-პატრიარქის, მისი უწმინდესობის ილია II-ის გარდაცვალების გამო.

მისი უწმინდესობა იყო გამორჩეული სულიერი ლიდერი, ერთიანობის, თანაგრძნობისა და იმედის სიმბოლო თავისი ერისთვის. მრავალი ათწლეულის განმავლობაში იგი ხელმძღვანელობდა საკუთარ მრევლს სიბრძნით, ღირსებით, სიმამაცით და წარუშლელი კვალი დატოვა საქართველოს სულიერ და კულტურულ ცხოვრებაში.

იგი იყო ებრაელი ხალხის ნამდვილი მეგობარი და მნიშვნელოვანი ფიგურა ჩვენი ორი ერის ისტორიული ურთიერთობების განმტკიცებაში. ამ მძიმე ეროვნული გლოვის დროს, ჩვენი ფიქრები თქვენთანაა.

ვიზიარებთ თქვენს მწუხარებას და გვჯერა, რომ მისი გამორჩეული სულიერი მემკვიდრეობა მომავალშიც გააგრძელებს შთაგონებასა და ნუგეშის მოტანას ქართველი ხალხისთვის", - აღნიშნულია მირი რეგევის მიერ მარიამ ქვრივიშვილისათვის გამოგზავნილ ოფიციალურ წერილში, რომელსაც სამინისტრო აქვეყნებს.