პაკისტანმა ირანს ცეცხლის შეწყვეტის შესახებ აშშ-ის წინადადება გადასცა, - ინფორმაციას Reuters-ი ირანელ ოფიციალურ პირზე დაყრდნობით ავრცელებს.

ირანელმა ოფიციალურმა პირმა Reuters-ს ანონიმურობის პირობის დაცვით განუცხადა, რომ აშშ-ის წინადადება მიიღეს, თუმცა არ დაადასტურა ეს ის 15-პუნქტიანი გეგმაა თუ არა, რომლის შესახებაც მანამდე ინფორმაცია მედიაში გავრცელდა.

ასევე, მისი თქმით, მხარეებს შორის მოლაპარაკებები, შესაძლოა, თურქეთში ან პაკისტანში გაიმართოს.

ცნობისთვის, აშშ-ის პრეზიდენტმა, დონალდ ტრამპმა განაცხადა, რომ აშშ-სა და ირანს შორის მოლაპარაკებები მიმდინარეობს და პროცესს აშშ-ის ვიცე-პრეზიდენტი ჯეი დი ვენსი და სახელმწიფო მდივანი მარკო რუბიო ხელმძღვანელობენ. ირანული მხარე მოლაპარაკებების მიმდინარეობას არ ადასტურებს.

ამასთან, Reuters-მა ინფორმირებულ წყაროზე დაყრდნობით გაავრცელა ინფორმაცია, რომ ვაშინგტონმა შეიმუშავა და თეირანს გაუგზავნა 15-პუნქტიანი გეგმა, რომელიც კონფლიქტის დასრულებას ისახავს მიზნად.