მოვუწოდებ ინფრასტრუქტურის მინისტრს, კურატორ მოადგილესა და სამინისტროს სხვა პასუხისმგებელ წარმომადგენლებს, მოვიდნენ სკოლასთან [მე-14 საჯარო სკოლა], დაელაპარაკონ პროტესტის მონაწილეებს და აიღონ პასუხისმგებლობა ამ ადამიანების წინაშე, რომ შესაძლებლად მოკლე დროში ააშენებენ სკოლას, - ამის შესახებ „ლელო-ძლიერი საქართველოს“ წევრმა, თბილისი საკრებულოს დეპუტატმა, ნიკა ჩერქეზიშვილმა განაცხადა.

მისი თქმით, მნიშვნელოვანია პასუხისმგებელი პირების უკუკავშირი.

„მეორე დღეა გრძელდება უწყვეტი საპროტესტო აქცია მე-14 საჯარო სკოლის ტერიტორიაზე, რომელიც უკვე მე-4 წელია, რაც ნაგავსაყრელადაა ქცეული. ამ ორი დღის განმავლობაში პასუხისმგებელი უწყებიდან არავინ გამოჩენილა და მოსულა მშობლებთან.

მოსწავლეები, მათი მშობლები და მასწავლებლების ნაწილი არ აპირებს პროტესტის შეწყვეტას იქამდე, ვიდრე ინფრასტრუქტურის სამინისტროსგან არ მიიღებენ კონკრეტულ პასუხს, თუ როდის დაიწყება და დასრულდება აღნიშნული სკოლის მშენებლობა.

მოვუწოდებ ინფრასტრუქტურის მინისტრს, კურატორ მოადგილესა და სამინისტროს სხვა პასუხისმგებელ წარმომადგენლებს, მოვიდნენ სკოლასთან, დაელაპარაკონ პროტესტის მონაწილეებს და აიღონ პასუხისმგებლობა ამ ადამიანების წინაშე, რომ შესაძლებლად მოკლე დროში ააშენებენ სკოლას.

მდგომარეობას ამძიმებს ის ამბავი, რომ ამ ორი საპროტესტო დღის განმავლობაში მოსწავლეები არ დადიან არც იმ სკოლაში, რომელსაც მიკედლებული არიან მე-4 წელია. შესაბამისად, პასუხისმგებელი პირების უკუკავშირი არის სასწრაფო!“,- აცხადებს ჩერქეზიშვილი.