„ჯეოსთილმა“ საწარმოში 11.2-მეგავატიანი მზის პანელები დაამონტაჟა, რაც რეგიონის ერთ-ერთი ყველაზე მასშტაბური განახლებადი ენერგიის პროექტია
ფოლადის საწარმო „ჯეოსთილმა", რომელიც საქართველოში არმატურის საერთო წარმოების 40%-ს ქმნის, 11.2 მეგავატიანი მზის პანელები დაამონტაჟა. ეს გახლავთ საქართველოში დღეისთვის ყველაზე მასშტაბური პროექტი, რომელიც მზის განახლებადი ენერგიის გამომუშავებას ახდენს.
პროექტს „ჯეოსთილის" ძირითადი საწარმოო ხაზების დღიური ელექტროენერგიის მოთხოვნის მნიშვნელოვანი ნაწილის დაკმაყოფილება შეუძლია. როგორც კომპანიაში განმარტავენ, 11.2 მეგავატიანი მზის ენერგიის სადგური საქართველოს ინდუსტრიული სტანდარტებით საკმაოდ დიდია და რეგიონში განახლებადი ენერგიის ერთ-ერთ ყველაზე ამბიციურ ლოკალურ პროექტს წარმოადგენს.
„მზის ენერგიაზე გადასვლა სამმა მნიშვნელოვანმა ფაქტორმა გადაგვაწყვეტინა:
- ეკონომიკური ეფექტურობა: მზის ენერგიის ეკონომიკური ეფექტურობის სწრაფი ზრდა;
- ხელსაყრელი რეგულაციები: საქართველოში არსებული საკანონმდებლო ბაზა, რომელიც ხელს უწყობს მწვანე ენერგიის ათვისებას;
- მდგრადი განვითარება: „ჯეოსთილის" გრძელვადიანი მდგრადი განვითარების სტრატეგია, რომელიც საოპერაციო ხარჯებისა და გამონაბოლქვის შემცირებას ისახავს მიზნად.
“ჩვენი მთავარი მოტივატორი კი რუსთავის ქარხნის მოდერნიზაციის სტრატეგიული ხედვა გახდა - ენერგოხარჯების შემცირება და მძიმე მრეწველობაში დეკარბონიზაციის ლიდერის პოზიციის მოპოვება," - აცხადებენ „ჯეოსთილში".
მზის პანელების დასამონტაჟებლად გამოყენებულია როგორც ქარხნის სახურავები, ისე მიწის ზედაპირი. მუშაობის პროცესში მთავარი გამოწვევა სახურავებზე კონსტრუქციის სრულყოფილი ინტეგრაცია, საწარმოო პროცესის შეფერხების მინიმუმამდე დაყვანა და აღჭურვილობის მტვრისა და სიცხისგან დაცვა იყო. კომპანიამ ამ საკითხების მოსაგვარებლად შესაბამისი გეგმა და განრიგი შეიმუშავა. პროცესი დეტალური სტრუქტურული შეფასებით დაიგეგმა და მონტაჟი ეტაპობრივად, წარმოების შედარებით დაბალი დატვირთვით მუშაობის პერიოდში განხორციელდა. უსაფრთხოების მკაცრი წესები და პროტოკოლები სისტემის მდგრადობასა და პერსონალის უსაფრთხოებას უზრუნველყოფს.
სარგებელი საზოგადოებისა და გარემოსთვის
განახლებადი ენერგიის გამომუშავება შიდა მოხმარებისთვის ხდება, თუმცა ის ქვეყნის ეკონომიკაში მნიშვნელოვან როლს შეასრულებს.
„სისტემა, პირველ რიგში, შიდა მოხმარებისთვისაა შექმნილი, რათა მაქსიმალურად დაიზოგოს ხარჯები და შემცირდეს გამონაბოლქვი. თუმცა ის ქვეყნის ერთიან ქსელსაც მნიშვნელოვან სარგებელს მოუტანს. საკუთარი მზის ენერგიის წყაროებიდან მიღებული ელექტროენერგიის გამოყენებით, ჩვენ სახელმწიფო ქსელის რესურსებზე დატვირთვას ვამცირებთ. შესაბამისად, პროექტს როგორც პირდაპირი კორპორაციული, ისე ფართო საზოგადოებრივი სარგებელი მოაქვს," - განმარტავენ კომპანიაში.
რუსთავის ქარხნის განახლებადი ენერგიის სისტემა წარმოებაში წიაღისეული საწვავით გამომუშავებული ელექტროენერგიის მოხმარებას ამცირებს, რაც ჰაერში მავნე ნივთიერებებისა და სათბური აირების გაფრქვევის შემცირებაზე პირდაპირ აისახება. ეს ნიშნავს სუფთა ჰაერს, ეკოლოგიური დაბინძურების რისკების შემცირებას და რუსთავში ინდუსტრიული განვითარების მდგრად ხელშეწყობას. საბოლოო შედეგი კი საზოგადოებრივი ჯანმრთელობისა და ეკონომიკის განვითარებაზე პოზიტიურად აისახება.
(R)
