საქართველოს ბიზნეს ასოციაციამ (BAG), საკანონმდებლო ბაზის განვითარების კომიტეტის ფარგლებში, წევრი კომპანიების წარმომადგენლებთან სამუშაო შეხვედრა გამართა. ამის შესახებ ინფორმაციას საქართველოს ბიზნეს ასოციაცია ავრცელებს.

ამავე ინფორმაციის თანახმად, შეხვედრის მთავარი თემა შრომითი მიგრაციის სფეროში დანერგილი ახალი რეგულაციები და მათი პრაქტიკული იმპლემენტაციის პროცესში არსებული გამოწვევები იყო.

„შეხვედრაზე დეტალურად განიხილეს „შრომითი მიგრაციის შესახებ" საქართველოს კანონში 2025 წელს შესული ცვლილებები და საქართველოს მთავრობის 2026 წლის N70 დადგენილება, რომელთა საფუძველზეც დაწესდა ახალი ვალდებულებები უცხოელი დასაქმებულებისა და მათი ადგილობრივი დამსაქმებლებისთვის, გაიწერა შესაბამისი პროცედურები იმ არარეზიდენტი თვითდასაქმებულებისათვის , რომლებიც მომსახურებას აწვდიან რეზიდენტ და არარეზიდენ იურიდიულ პირებს.

შეხვედრაზე დეტალურად იქნა განხილული სამართლებრივი და პროცედურული სირთულეები, რაც ახალი რეგულაციების ძალაში შესვლის დღიდან წარმოიშვა უცხოელთა დასაქმების ან მათგან მომსახურების მიღების პროცესში; ხაზი გაესვა ამ სირთულეების შესაძლო გავლენას რიგი მნიშვნელოვანი, მაღალტექნოლოგიური და დიდი ინსფრასტრუქტურული პროექტების განხორციელების პროცესში”, - აღნიშნულია ინფორმაციაში.

ბიზნეს ასოციაციის ცნობით, შეხვედრა მიზნად ისახავდა ასოციაციის წევრებს შორის შესაბამისი გამოწვევების შესახებ ინფორმაციის გაცვლას და ერთიანი პოზიციის ჩამოყალიბებას სამუშაო პროცესის შემდგომი დაგეგმვისა და კოორდინირებული წარმართვის მიზნებისათვის

„საქართველოს ბიზნეს ასოციაციისთვის მნიშვნელოვანია, რომ შრომითი მიგრაციის მართვის პროცესი იყოს გამჭვირვალე და ეფექტური, თუმცა ამავდროულად, მან არ უნდა შეაფერხოს ბიზნეს საქმიანობა და ქვეყანაში კვალიფიციური კადრების მოზიდვის შესაძლებლობა. მსგავსი ფორმატის შეხვედრები გვეხმარება, ბიზნესისაგან მივიღოთ დეტალური, პრაქტიკული ინფორმაცია არსებულ პრობლემებზე და ერთობლივი ძალისხმევით ვიმუშაოთ მათ გადაჭრაზე", - განაცხადა საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ.