დღეის მდგომარეობით, თბილისში, საცურაო აუზებითა და ფიტნეს დარბაზებით უფასოდ, 60 წელს გადაცილებული 914 მოქალაქე სარგებლობს. სახელოვნებო კლუბებში კი 234 მოქალაქეა ჩართული.

როგორ „ინტერპრესნიუსს“ დედაქალაქის მერიაში განუცხადეს, ამ დროისთვის, პროგრამა „სპორტი უფროსი თაობისთვის“ 9 სპორტულ ცენტრში ხორციელდება.

მათივე ინფორმაციით, პროგრამის დანერგვიდან დღემდე სპორტული სერვისებით უფასოდ, ჯამში, 3 ათასზე მეტმა მოქალაქემ ისარგებლა.

რაც შეეხება 60 წელზე ზემოთ მოქალაქეებისთვის სხვა სერვისებს, სახელოვნებო მიმართულებით 60+ კლუბში 234 მოქალაქეა ჩართული. მათ შორის საბურთალოს რაიონში 110, თემქაზე 94, ხოლო დიღომში 30.

თბილისის მერიის ინფორმაციით, 60 წელს ზემოთ ასაკის მოქალაქეებისთვის სახელოვნებო კლუბი აერთიანებს შემდეგ სერვისებს: ხატვა, სიმღერა, ხელსაქმე, ვარჯიში და ცეკვა (ქართული, სამეჯლისო).