დეპუტატი თინა ხიდაშელი უკრაინელ ექსპერტებს შეხვდა. პარლამენტში გამართული შეხვედრა პროექტის "უკრაინა გამოსავლის ძიებაში დიალოგის გზით" ფარგლებში გაიმართა.

უკრაინელი სტუმრები საქართველოში განხორციელებული რეფორმებითა და მიმდინარე პოლიტიკური პროცესებით დაინტერესდნენ. როგორც მათ აღნიშნეს, ქვეყნისთვის, რომელიც ერთი მხრივ ომშია ჩაბმული და მეორე მხრივ, რეფორმები აქვს განსახორციელებელი, საქართველოს გამოცდილების გაზიარება მნიშვნელოვანია. ისინი ქართულ-აფხაზური ურთიერთობებითაც დაინტერესდნენ. საუბარი ასევე შეეხო რუსეთის როლს რეგიონში მიმდინარე პროცესებში. ისაუბრეს არსებული გამოწვევებისა და მათი დაძლევის გზებზე.

უკრაინელი ექსპერტების, სამოქალაქო საზოგადოებისა და აკადემიური წრეების წარმომადგენლების მონაწილეობით გამართული შეხვედრის მიზანი საქართველოში განხორციელებული რეფორმებისა და მიმდინარე პროცესების დეტალური გაცნობაა.