ევროკავშირის სადამკვირვებლო მისია ერგნეთში, ინციდენტების პრევენციისა და მათზე რეაგირების მექანიზმის ფარგლებში დღეს გამართულ რიგით 89-ე შეხვედრასთან დაკავშირებით ინფორმაციას ავრცელებს. მათი ინფორმაციით, შეხვედრას უძღვებოდნენ საქართველოში ევროკავშირის სადამკვირვებლო მისიის ხელმძღვანელი ერიკ ჰოგი და ელჩი რუდოლფ მიხალკა, სამხრეთ კავკასიაში ეუთო-ს მოქმედი თავმჯდომარე ქვეყნის სპეციალური წარმომადგენელი.

„სხვადასხვა მოსაზრება გამოითქვა დროებით დღისწესრიგთან დაკავშირებით და მხარეებმა ვერ შეძლეს დისკუსიების გაგრძელება. შუამავლებმა სინანული გამოხატეს, რომ შეუძლებელი იყო დღისწესრიგის საკითხების განხილვა. მათ პრაგმატული მიდგომისკენ მოუწოდეს მონაწილეებს. საქართველოში ევროკავშირის სადამკვირვებლო მისიამ და ეუთო-მ მტკიცე მხარდაჭერას გამოუხატეს ინციდენტების პრევენციისა და მათზე რეაგირების მექანიზმის ფორმატს, როგორც ერთადერთ ღირებულ მექანიზმს ადმინისტრაციული საზღვრის მიმდებარე ტერიტორიაზე მცხოვრები მოსახლეობის უსაფრთხოების საკითხის განსახილველად. თანაშუამავლები განაგრძობენ ძალისხმევის გამოყენებას, რათა ინციდენტების პრევენციისა და მათზე რეაგირების მექანიზმის შეხვედრა რაც შეიძლება მალე განახლდეს მონაწილეების მიერ შეთანხმებული თარიღით“, - ნათქვამია განცხადებაში.