აშშ-ს უსაფრთხოებისთვის უმთავრეს საფრთხეს რუსეთის ბირთვული შეიარაღება წარმოადგენს, - ამის შესახებ აშშ-ს თავდაცვის მდივანმა ჯეიმს მატისმა ვირჯინიის სამხედრო ინსტიტუტში სიტყვით გამოსვლისას განაცხადა.

„თუ გარე საფრთხეებს შევხედავთ, პირველი საფრთხე, რომელსაც ყურადღება უნდა მივაქციოთ, ეს რუსეთის მხრიდან ბირთვული საფრთხეა. ეს საფრთხე ნაკლებია ჩინეთის მხრიდან და ასევე ჩრდილოეთ კორეის მხრიდან, თუმცა ჩრდილოეთ კორეა ახლა საჭირბოროტო საკითხს წარმოადგენს“, - განაცხადა აშშ-ს თავდაცვის მდივანმა.

ჯეიმ მატისის განმარტებით, „ბირთვული საფრთხე ზოგადად რეალური საფრთხეა და აშშ-ს ზომების მიღება უწევს, რათა გაუმკლავდეს მას“.

„ჩვენ შეკავება გვჭირდება, ვინაიდან შეუძლებელია ბირთვული ომის მოგება. შესაბამისად, მისი დაწყება დაუშვებელია“, - დასძინა მან.

შეგახსენებთ, რომ აქამდე პენტაგონმა აშშ-ს ბირთვული დოქტრინა გამოაქვეყნა, რომელშიც დიდი ყურადღება იყო გამახვილებული რუსეთის ბირთვული ძალების განვითარებაზე.