1-ელი აგვისტოდან დღემდე 30 კომპანია შემოწმდა და შრომის უსაფრთხოების ნორმები არც ერთში არ იყო სრულად დაცული, - ამის შესახებ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ თამილა ბარკალაიამ განაცხადა. მისივე თქმით, მას შემდეგ, რაც ამოქმედდა არანებაყოფლობით ინსპექტორება, შემოწმდა 30 კომპანია და გაცემულია რეკომენდაციები.

„1-ელი აგვისტოდან დღემდე დაახლოებით 30 კომპანიაა შემოწმებული და ინსპექტირებაა ჩატარებული. ამ 30 კომპანიიდან დაახლოებით 80%-ში იყო საშუალო რისკის შეფასება და შესაბამისი რეკომენდაციებია გაცემული. არც ერთი კომპანია არ ყოფილა, სადაც სრულად იყო დაცული შრომის უსაფრთხოების ნორმები. შესაბამისად, ყველა კომპანიის მიმართ გაიცა რეკომენდაცია. ამ რეკომენდაციების შესასრულებლად გონივრული ვადა არის მიცემული და ამ გონივრული ვადის ამოწურვის შემდეგ, ჩვენ უკვე ვემზადებით რემონიტორინგისთვის. იმ შემთხვევაში, თუ არ იქნება ეს რეკომენდაციები გათვალისწინებული, ამოქმედდება სანქცირების ის მექანიზმები, რომელიც კანონითა არის გათვალისწინებული", - განაცხადა ბარკალაიამ.