ჯანდაცვის სამინისტროს სახელმწიფო სამედიცინო საქმიანობის რეგულირების სააგენტოს ყოფილ თავმჯდომარეს გია თვალავაძეს ექიმები და საზოგადო მოღვაწეები თავდებში უდგებიან. მისი თავდებით გათავისუფლების შუამდგომლობა თვალავაძის ადვოკატმა ლალი აფციაურმა დააყენა. ადვოკატმა სასამართლოს ბრალდებულის მიმართ ნაკლებად მკაცრი აღკვეთის ღონისძიების გამოყენების რამდენიმე ფორმა შესთავაზა, მათ შორის გირაოს შეფარდება და მისი თავდებით გათავისუფლება. ადვოკატის განმარტებით, თვალავაძეს თავდებში არაერთი ადამიანი უდგება, მათ შორის ცნობილი მედიკოსები და საზოგადო მოღვაწეები.
ამასთან, ლალი აფციაურმა აღნიშნა, რომ ბრალდების მხარის მიერ დასახელებული პატიმრობის გამოყენების საფუძვლები დაუსაბუთებელია. ლალი აფციაურის თქმით, პროკურატურას არც ერთი კონკრეტული მაგალითი არ მოუყვანია თუ რომელ მოწმეზე მოხდინა ან შეიძლება მოახდინოს ზეწოლა გია თვალავაძემ. ამასთან, ლალი აფციაურის თქმით, თვალავაძეს გულთან დაკავშირებული პრობლემები აწუხებს და აღკვეთის ღონისძიების შერჩევისას მისი ჯანმრთელობის მდგომარეობაც გასათვალისწინებელია.