ყოვლადწმინდა ღვთისმშობელი საქართველოს განსაკუთრებული მფარველია, არაერთხელ გადაურჩენია საქართველო დაცემისგან, - ამის შესახებ სრულიად საქართველოს კათოლიკოს-პატრიარქმა ილია მეორემ მახათას მთაზე, ივერიის ყოვლადწმინდა ღვთისმშობლის ხატის სახელობის ტაძარში სადღესასწაულო ლიტურგიისას განაცხადა.

ტაძარში ღვთისმშობლის სავედრებელი ლოცვა პატრიარქმა და მრევლმა ერთად აღავლინეს.

„ჩვენთან არს ღმერთი. ამ დიდებულ დღესასწაულს ყველას გილოცავთ, ყოვლადწმინდა ღვთისმშობლის ხატის ათონის მთიდან საქართველოში ჩამობრძანებას. ყველას გილოცავთ იოანე ღვთისმეტყველის დღესასწაულს. ყოვლადწმინდა ღვთისმშობელი საქართველოს განსაკუთრებული მფარველია. არაერთხელ გადაურჩენია საქართველო დაცემისგან. მე, მინდა, გაგახსენოთ ის მძიმე დღე, როცა საქართველოს მონღოლები შემოესივნენ. ყოვლადწმინდა ღვთისმშობელი გამოეცხადა და ერთმა მოხუცებულმა ადამიანმა, ქართველმა კაცმა სთხოვა, ილოცეთ, მოწყალებისა კარი განგვიღე. ჩვენც ახლა, შევთხოვთ ყოვლადწმინდა ღვთისმშობელ დედას, რომ მოწყალებისა კარი განგვიღოს და ეს ლოცვა ერთად ვთქვათ“, -მიმართა პატრიარქმა მრევლს.

მართლმადიდებელი ეკლესია დღეს წმინდა მოციქულის, იოანე ღვთისმეტყველის მიცვალების დღეს და 1989 წელს საქართველოში ათონის მთიდან ივერიის ყოვლადწმიდა ღმრთისმშობლის ხატის ასლის ჩამობრძანებას აღნიშნავს.

ამასთან დაკავშირებით ტაძრებში წირვა–ლოცვა სრულდება.

ივერიის ყოვლადწმინდა ღვთისმშობლის ხატის, პორტაიტის ასლი, ათონის მთის ბერებმა საქართველოს კათოლიკოს-პატრიარქის, ილია II-ის ლოცვა-კურთხევით, ქართველი ერისადმი სიყვარულისა და მადლიერების გამოსახატავად დაწერეს.

აღნიშნული ხატი თბილისის სიონის საპატრიარქო ტაძარშია დაბრძანებული.