უკრაინელმა მესაზღვრეებმა ქართველი კრიმინალური ავტორიტეტი დააკავეს. ამის შესახებ უკრაინის სასაზღვრო სამსახური იუწყება.

„ოდესის ოლქის მესაზღვრეებმა უკრაინის უშიშროების სამსახურისა და ეროვნული პოლიციის წარმომადგენლებთან ერთად ქვეყანაში უცხოელი კრიმინალური ავტორიტეტის შესვლის მცდელობა აღკვეთეს. მოქალაქე „შავი ზღვის საზღვაო პორტის“ საერთაშორისო გამშვებ პუნქტში, საქართველოდან ჩამოსული რეისის მგზავრების გაფორმებისას დააკავეს. სამართალდამცველების ყურადღება ერთ-ერთი მგზავრის ნერვულმა ქცევამ მიიპყრო, რის გამოც მის მიმართ უფრო საფუძვლიანი კონტროლის ჩატარება გადაწყდა. მისი საბუთების დეტალური შემოწმებისას აღმოჩნდა, რომ საქართველოს 48 წლის მოქალაქე კრიმინალური ავტორიტეტია და 28 წელი პატიმრობაში აქვს გატარებული“, - ნათქვამია განცხადებაში.

საქართველოს მოქალაქეს საზღვრის გადაკვეთაში უარი ეთქვა და უკრაინის ტერიტორიაზე შესვლა აეკრძალა.

უკრაინის სასაზღვრო სამსახურს საქართველოს მოქალაქის ვინაობა არ გაუსაჯაროებია.