ეს ჩანაწერები არის იმის დასტური, რასაც მე 10 თვეა გავიძახი, - ამის შესახებ "ინტერპრესნიუსს" ხორავას ქუჩაზე მოკლული დათო სარალიძის მამამ ზაზა სარალიძემ განუცხადა. მისი თქმით, ხელისუფლება უნდა გადადგეს, რადგან ისინი მფარველობენ დამნაშავეებს.

ზაზა სარალიძე იმედოვნებს, რომ აღნიშნულ აუდიო ჩანაწერებს, რომელიც "რუსთავი2"-ის ინფორმაციით პენიტენციურ დაწესებულებაშია ჩაწერილი, საზოგადოების მხრიდან მყისიერი რეაგირება ექნება. "ეს არის ის, რასაც მე ვიძახი 10 თვეა. ესენი ხელს აფარებენ მკვლელებს და თვითონ არიან დამნაშავეები. უნდა გადადგეს ხელისუფლება! აქციები გრძელდება და იმედია საზოგადოება გვერდით დაგვიდგება", - აღნიშნა ზაზა სარალიძემ.