ფრაქცია „პატრიოტთა ალიანსის“ თავმჯდომარე ირმა ინაშვილი მირზა სუბელიანთან სიმართლის გასარკვევად შეხვედრას გეგმავს.

როგორც ინაშვილმა ჟურნალისტებს განუცხადა, ის წერილობით მიმართავს პარლამენტის თავმჯდომარეს და შეხვედრის ნებართვას მოითხოვს.

„თუ ეს ყველაფერი მართალია, რასაც ვისმენთ, მაშინ სახელმწიფოებრიობის პრობლემასთან გვქონია საქმე. მე ვგეგმავ პირადად ვთხოვო პარლამენტის თავმჯდომარეს და შევხვდე მირზა სუბელიანს, თუ მისი სურვილი იქნება კამერების თანხლებით, რადგან მინდა პირადად მისგან მოვისმინო სიმართლე“, - განაცხადა ირმა ინაშვილმა.

ცნობისთვის, „რუსთავი 2“-მა გუშინ სავარაუდოდ ხორავას ქუჩაზე მოკლული მოზარდების საქმეზე დანაშაულის შეუტყობინებლობის ბრალდებით დაკავებული მირზა სუბელიანის, დეპუტატ ვიქტორ ჯაფარიძის და დევნილთა სამინისტროს ყოფილი თანამშრომლის აუდიო ჩანაწერი გაავრცელა. ტელეკომპანიის ინფორმაციით, ჩანაწერი გლდანის #8 სასჯელაღსრულების დაწესებულებაშია გაკეთებული და მასთან ერთად საკანში „ქართული ოცნების“ დეპუტატი მესტიიდან, ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი იმყოფება.

ჩანაწერების მიხედვით, სავარაუდოდ, მირზა სუბელიანი საუბრობს, რომ ის საკუთარი ნებით ჩაჯდა ციხეში და გაურიგდა ხელისუფლებას, მაგრამ სუბელიანი უკმაყოფილებას გამოთქვამს მმართველი გუნდის დამოკიდებულებით და ამბობს, რომ ხელისუფლება ჯეროვნად ვერ აფასებს მის ერთგულებას.