საქართველოს არ სჭირდება და საშიშია პრეზიდენტი, რომელიც ომის დაწყებას საკუთარ ქვეყანას აბრალებს და საკუთარი პოლიტიკური ინტერესებისათვის ეთნიკურ შუღლს აღვივებს - ასეთია ბიძინა ივანიშვილის მიერ შერჩეული პრეზიდენტობის სამარცხვინო კანდიდატი სალომე ზურაბიშვილი, - ამის შესახებ ჟურნალისტებს „ევროპული საქართველოს“ ერთ-ერთმა ლიდერმა გიგა ბოკერიამ განუცხადა.

ბოკერიას თქმით, საქართველოს ასევე არ სჭირდება ისეთი პრეზიდენტი, რომელიც მმართველ პარტიას უპასუხისმგებლო პოპულიზმში ეჯიბრება და როგორიც არის პრეზიდენტობის კანდიდატი გრიგოლ ვაშაძე.

„საქართველოს სჭირდება პრეზიდენტი, რომელიც მის ინტერესებს დაიცავს როგორც ქვეყნის შიგნით, ასევე ქვეყნის გარეთ, რომელსაც აქვს ხედვა და რწმენა მშვიდობიანი შეცვლის. პრეზიდენტობის ასეთი კანდიდატია დავით ბაქრაძე“, - განაცხადა გიგა ბოკერიამ.

„ევროპული საქართველოს“ პრეზიდენტობის კანდიდატი დავით ბაქრაძე დღეს თბილისის სპორტის სასახლეში საკუთარ მხარდამჭერებს შეხვდა.