ფრაქცია „ერთიანი ნაციონალური მოძრაობის“ თავმჯდომარის, თინა ბოკუჩავას განცხადებით, „უცხოური გავლენის გამჭვირვალობის“ შესახებ კანონპროექტის მიღების ერთადერთი რეალური მიზანი არის ხელისუფლების დაკარგვის შიში, რომელიც ბიძინა ივანიშვილს ამოძრავებს. მან პარლამენტში სიტყვით გამოსვლისას უმრავლესობას მიმართა, რომ ამ კანონპროექტის მიზანი არის არჩევნების წინ ადამიანების დაღლა და საპროტესტო მუხტის ჩახშობა.
„ვერ მივიღეთ პასუხი, გარდა თქვენი პროპაგანდისა იმასთან დაკავშირებით, ეთანხმებით თუ არა ბიძინა ივანიშვილს, რომელიც გუშინ იდგა სცენაზე „რუსულ მარშზე“ და ძალდატანებით ჩამოყვანილ ადამიანებს ღიად ეუბნებოდა, რომ „რუსული კანონის, ამ მოღალატეობრივი კანონის მიღება მას სჭირდება იმისთვის და შესაბამისად, ამ კანონის მიზანი არის ის, რომ არჩევნების წინ ადამიანები დაღალოს, საპროტესტო მუხტი ჩაახშოს და გაფლანგოს, ეს მან ღიად თქვა. თქვენ 2008 წლის დოკუმენტებს რომ კითხულობთ და რამდენიმე დღის წინ ევროპარლამენტის რეზოლუციას რომ უგულებელყოფთ, რატომ არ გყოფნით გამბედაობა, დაეთანხმოთ თქვენს ბელადს და საზოგადოებასთან აღიაროთ, რომ დიახ, ამ კანონის მიღების ერთადერთი რეალური მიზანი არის ხელისუფლების დაკარგვის შიში, რომელიც ამოძრავებს ივანიშვილს და რომელიც გავალებთ თქვენ, რომ ქართველი ხალხის ერთხელ გაწვეული კანონი, კვლავ შემოიტანოთ და პარლამენტში გაიტანოთ“, - განაცხადა ბოკუჩავამ.