თბილისის საკრებულომ დღევანდელ სხდომაზე ამორტიზებული ლიფტების მოდერნიზაციის მიზნით, ამხანაგობებისთვის უპროცენტო სესხის მიღების საკითხი განიხილა.

საკრებულოს საფინანსო-საბიუჯეტო კომისიის თავმჯდომარის, თამაზ შოშიაშვილის განცხადებით, მოდერნიზაცია ითვალისწინებს ლიფტების კაპიტალურ შეკეთებას.

მისივე თქმით, მიმდინარე შეკეთებისთვის თანხა მერიიდან ისედაც გამოიყოფოდა, ამ პროექტით კი, მოსახლეობას საშუალება ექნება, ლიფტების მოდერნიზაციისთვის თბილისის მერიიდან სესხი უპროცენტოდ და უზრუნველყოფის გარეშე მიიღოს.

მერია ლიფტების დასამონტაჟებლად ღირებულების 100% გადაიხდის, საიდანაც 70% საჩუქარი იქნება მობინადრეებისთვის, ხოლო 30% პროცენტს მოსახლეობა 4 წლის განმავლობაში განვადების სახით, უპროცენტოდ დაფარავს.;

როგორც “ინტერპრესნიუსს” შოშიაშვილმა განუცხადა, თბილისის ბიუჯეტში ლიფტების პროგრამისთვის 30 მლნ ლარია გათვალისწინებული. აქედან, ლიფტების მოდერნიზაციისთვის წლის განმავლობაში, დაახლოებით, 9 მლნ ლარი დაიხარჯება.

;