სოფლის მეურნეობის მინისტრი ბაკურ კვეზერელი აზოტის გვარჯილას დარიგების დაწყებასთან დაკავშირებით დღეს რუსთავის “აზოტის” ქარხანას ეწვია.;

როგორც “ინტერპრესნიუსს” სოფლის მეურნეობის სამინისტროს პრესსამსახურიდან აცნობეს,; აზოტის გვარჯილა მთელი საქართველოს მასშტაბით, 939 925 კომლს დაურიგდება, რაც ქვეყნის ყველა რეგიონში მცხოვრებ გლეხებს მიწის გამდიდრების საშუალებას მისცემს.

სამინისტროს ბიუჯეტიდან რუსთავის აზოტისგან სასუქის შესაძენად 25 მილიონ ლარამდეა გამოყოფილი. ამ თანხაში მისი ტრანსპორტირების ხარჯებიც შედის.

სოფლის მეურნეობის სამინისტრო ქარხნისგან 47 ათას ტონამდე გვარჯილას შეიძენს, რაც მსოფლიო ფინანსური კრიზისის დროს ქარხანაში დასაქმებულ პერსონალს სამუშაო ადგილებს შეუნარჩუნებს.

მეორე მხრივ, პროექტი გლეხებსაც დაეხმარება, რადგან ნებისმიერი სოფლის მეურნეობის სავარგულისთვის საჭირო სასუქს უფასოდ მიიღებენ.

აზოტის გვარჯილას დარიგება უკვე დაიწყო ქვემო ქართლის რეგიონიდან და უახლოეს მომავალში მთელს საქართველოს მოიცავს.

;