ევროკავშირის უმაღლესი წარმომადგენელი საგარეო და უსაფრთხოების საკითხებში  ბარონესა ქეთრინ ეშტონი სოფელ ოძისის ქართულ ბლოკპოსტზე იმყოფება .

ახალგორის რაიონის მოსაზღვრე ქართულ სოფელში ქეთრინ ეშტონი დაახლოებით 9:50 საათზე ევროკავშირის დამკვირვებლებთან ერთად მივიდა.

დამკვირვებლებმა ქეთრინ ეშტონს მიაწოდეს დეტალური ინფორმაცია საოკუპაციო ზოლს გასწვრივ მდებარე სოფლებში არსებული მდგომარეობის შესახებ. ასევე, ქეთრინ ეშტონმა მათგან მიიღო მონაცემები ქართული და რუსული ბლოკსაგუშაგოების მდებარეობის, ადმინისტრაციული საზღვრის გადაკვეთის მოქმედი წესების შესახებ.

ქეთრინ ეშტონს აცნობეს, რომ ადმინისტრაციულ საზღვარს იქით უმთავრესად ქართული სოფლებია.

სოფელ ოძისის ბლოკპოსტზე იმყოფება ევროკავშირის სადამკვირვებლო მისიის ხელმძღვანელი ჰანსიორგ ჰაბერი.

სოფელი ოძისი ახალგორის რაიონის მოსაზღვრე ბოლო ქართული სოფელია. აქედან ერთ კილომეტრში ახალგორის სოფელი ახმაჯი მდებარეობს.