რეისი რუსთავი-გლდანი გაძვირდა
რუსთავი-გლდანის სამარშრუტო ტაქსით მგზავრობის ღირებულება დღეიდან 2 ლარს შეადგენს .
ამ დრომდე რუსთავი-გლდანის სამარშრუტო ტაქსით მგზავრობის ღირებულება 1,50 ლარი იყო, იგივე სამარშრუტო ტაქსით რუსთავიდან დიდუბემდე მგზავრობა 1,50 ლარი ღირს.
როგორც "ინტერპრესნიუსს" აღნიშნული სამარშრუტო ტაქსების მძღოლებმა განუცხადეს, ეს საწვავის გაძვირებამ გამოიწვია. მძღოლები აცხადებენ, რომ საწვავი უკვე 2 ლარს შეადგენს და შესაბამისად, მათ უჭირთ ხარჯების ანაზღაურება.
გარდა საწვავისა, მძღოლები მგზავრობის გაძვირების მიზეზად, ავტომობილის შენახვასთან დაკავშირებულ ხარჯებსაც ასახელებენ და ამბობენ, რომ მათ ჰყავთ ოჯახები, რომელთაც რჩენა სჭირდებათ. 
მძღოლები იმის პირობასაც იძლევიან, რომ თუკი საწვავის ფასი დაიკლებს, მგზავრობის ღირებულებასაც გააიაფებენ.
რუსთავიდან თბილისის მიმართულებით მოძრავი ყველა სამარშრუტო ტაქსის ღირებულება დღეიდან 50 თეთრით გაიზარდა და ძირითადად, 1,50 ლარს შეადგენს, თუმცა, ზოგიერთ მარშრუტზე მგზავრობა 2 ლარიც ღირს.
