ჰაკერმა "Facebook"-ში სოციალური ქსელის დამფუძნებლის მარკ ცუკერბერგის პირადი გვერდი "გატეხა". ამის შესახებ "The Telegraph" იუწყება.

"რატომ არ შეიძლება "Facebook" სოციალურ საქმედ იქცეს, როგორც ამას ნობელის პრემიის ლაურეატი მუჰამედ იუნისი წერდა", - სწორედ ასეთი შეტყობინება დატოვა დაუპატიჟებელმა სტუმარმა ცუკერბერგის გვერდზე.

შეტყობინებას კი დაახლოებით 500 კომენტარი მოჰყვა, "მოწონების" ნიშანი კი 2000-ზე მეტმა მომხმარებელმა დასვა.

კომპანია "შოპჰოს"-ს წარმომადგენლის გრემ კლულის განცხადებით, ჯერ დაუდგენელია, თუ როგორ მოახერხა უცნობმა ცუკერბერგის გვერდზე შეღწევა.

გარკვეული პერიოდის განმავლობაში სოციალური ქსელის დამფუძნებლის გვერდი მიუწვდომელი იყო, თუმცა, ამ დროისთვის ჰაკერის მიერ დატოვებული შეტყობინება წაშლილია. გვერდზე ბოლო ჩანაწერი 2010 წლის დეკემბრით თარიღდება.