ამერიკის შეერთებულ შტატებში ქართული სახლი-კორპორაცია “გრაალი” დაფუძნდა.

როგორც “ინტერპრესნიუსს” ნიუ-იორკის ქართული დიასპორიდან დღეს აცნობეს, “გრაალის” დაფუძნება აშშ-ში არსებული მრავალრიცხოვანი ქართული დიასპორის წინაშე არსებულმა პრობლემებმა განაპირობა.

ნიუ-იორკში “გრაალის” დამფუძნებლები ირმა გვაზავა, მაია საბანაძე, ჟურნალისტი ქეთი ბერიანიძე და მსახიობი ხათუნა იოსელიანი არიან.

როგორც “გრაალის” დამფუძნებლები აცხადებენ, ამერიკაში ქართული ემიგრაცია არა ერთ წელს ითვლის. იქ მცხოვრები ქართველების შთამომავლებს კი მშობლიურ ენაზე საუბარი უჭირთ, არ იცნობენ ქართულ კულტურასა და ტრადიციებს. “გრაალის” დაარსების მიზანი დაქსაქსული ქართული საზოგადოების გაერთიანებისა და გაძლიერებისათვის ხელის შეწყობაა.

ამერიკაში ქართული კულტურის განვითარება-პოპულარიზაციისა და იქ მცხოვრები ქართველებისთვის ფუნქციონირება დაიწყო - ქართულმა საკვირაო სკოლამ, საბავშვო და მოზარდმაყურებელთა თეატრმა, ვოკალურ-ინსტრუმენტულმა ანსამბლმა, კლასიკური მუსიკის სტუდიამ, ჭადრაკის წრემ, სოციალური და იურიდიული მომსახურების ცენტრმა, ბიბლიოთეკამ ქართული წიგნადი ფონდით და ქართველ მოზარდთა შეხვედრის ცენტრმა.

~გრაალის~ დამფუძნებლების თქმით, ქართული სახლი-კორპორაცია “გრაალის” კარი ყველა ქართველისთვის ღიაა.

;