საქართველოში სტუმრად მყოფმა ათონის წმინდა მთის ბერებმა დღეს სიონის საკათედრო ტაძარში წირვა აღავლინეს.

დღესვე, სტუმრები თბილისის სასულიერო სემინარია-აკადემიას ეწვივნენ და სტუდენტებს შეხვდენ. 20 თებერვალს კი ათონელი ბერების დელეგაცია ყოვლადწმინდა სამების საპატრიარქო ტაძარში სრულიად საქართველოს კათოლიკოს-პატრიარქთან, უწმინდესსა და უნეტარეს ილია II-სთან ერთად თანამსახურებით საღმრთო ლიტურგიას აღავლენენ.

საქართველოს მართლმადიდებელ ეკლესიას მეგობრული ვიზიტით ათონის წმინდა მთის ბერების ჯგუფი გუშინ ეწვია. სტუმრებს შორის არიან ვატოპედის მონასტრს წინამძღვარი, არქიმანდრიტი ეფრემი (კოცოუვატოპაიდინოსი) და ამავე მონასტრის საძმოს წევრები: ბერი ტრიფონი (კელაპტრიშვილი), ბერი თეოდოხოსი (ლაშა მრელაშვილი), ბერი ნექტარიოსი (მახარე გელაშვილი) და ბერი ნოკოდიმოსი (ანდრეას დიმიტრიოუ). მათ თან ახლავთ ორი საერო პირი ქრისტოს ჰაჯისპიროუ და ქრისტოს ანდრონისი.

ათონელი ბერების დელეგაცია საპატრიარქო რეზიდენციაში გუშინ სრულიად საქართველოს კათოლიკოს-პატრიარქმა, უწმინდესმა და უნეტარესმა ილია II-მ მიიღო. პატრიარქმა სტუმრებს საპატრიარქოში არსებული სიწმინდეები დაათვალიერებინა. თავის მხრივ ვატოპედის მონასტრის არქიმანდრიტმა ეფრემმა კათოლიკოს-პატრიარქს ვატოპედის ისტორიის ამსახველი ალბომი უსახსოვრა.

ათონელი ბერები საქართველოში 10 დღე დარჩებიან და სიწმინდეებს მოილოცავენ.