იაპონიაში მომხდარი სტიქიური უბედურების გამო, საქართველოში მომუშავე ავტომანქანების იმპორტიორი კომპანიები გაურკვევლობაში არიან.

როგორც ”ინტერპრესნიუსს” კომპანია ”ავტო-ტრეიდერის” წარმომადგენელმა, გია მესხაძემ განუცხადა, თუ როგორ მოხდება იაპონიიდან საქართველოში სარეალიზაციოდ მანქანების ჩამოყვანა არა მარტო ქართველებისთვის, იაპონელი დილერებისთვისაც კი გაურკვეველია.

”სრულიად გაურკვეველია, როგორ განვითარდება მოვლენები. თავად იაპონიაშიც არ იციან და ვერაფერს გვეუბნებიან, რა იქნება სამომავლოდ”,-განაცხადა გია მესხაძემ.

მისივე ინფორმაციით, მსოფლიო კრიზისის გამო, იაპონიიდან ბოლო 2 წელია, ავტომანქანების ჩამოყვანის მაჩვენებელი ისედაც შემცირებული იყო, რასაც ხელს ისიც უწყობს, რომ მსოფლიოს სხვადასხვა ქვეყნიდან საქართველოში მეორადი იაპონური მანქანები შემოდის. ეს კი ავტობაზრის "ფასებზე თამაშობს" და ”მეორადი” მანქანები ახალი მანქანებს სერიოზულ კონკურენციას უწევენ.