პროექტ "ამხილე ჯალათის" მორიგი აქცია გაიმართა
სახალხო კრების ახალგაზრდულმა ორგანიზაციამ და მოძრაობა "არა"-ს აქტივისტებმა პროექტ "ამხილე ჯალათის" მორიგი საპროტესტო აქცია გამართეს.
რამდენიმე ათეული ახალგაზრდა ზაქარიაძის ქუჩის #11-თან შეიკრიბა, სადაც მათი ინფორმაციით, პოლიციის მაღალჩინოსანი გოდერძი ნატროშვილი ცხოვრობს.
როგორც მოძრაობა "არა"-ს ლიდერმა ლევან ჩიტაძემ განაცხადა, გოდერძი ნატროშვილი 2007 წლის 7 ნოემბრიდან მოყოლებული, აქტიურად მონაწილეობდა მშვიდობიანი საპროტესტო აქციების დარბევებში, აქციის მონაწილეების ცემასა და დაპატიმრებებში, რაც საბოლოოდ მისი კარიერული წინსვლის საბაბი გახდა. ჩიტაძის თქმით, დღეისათვის გოდერძი ნატროშვილი ისან-სამგორის პოლიციის უფროსია.
საპროტესტო აქციის მონაწილეებმა ზაქარიაძის ქუჩის #11-თან ნატროშვილის ფოტოები გააკრეს წარწერით "ვიცით ვინც ხარ". მათი განცხადებით, პროექტ "ამხილე ჯალათის ფარგლებში" ანალოგიური საპროტესტო აქციები გაგრძელდება და პოლიციის კიდევ ბევრ მაღალჩინოსანს ამხელენ.
