როკ-ფესტივალი "Global East Rock Festival 2011 Batumi Open Air" ბათუმში, ივლისში გაიმართება.

როგორც ~ინტერპრესნიუსის~ ოფისში გამართულ პრესკონფერენციაზე ფესტივალის ორგანიზატორებმა _ პოლონურ-უკრაინული საკონცერტო სააგენტო "Global Promotion"-ის დირექტორმა დმიტრო ხლივინსკიმ და საქართველოს როკ-მუსიკის ეროვნული ასოციაციის თავმჯდომარე ერნსტ ხერუმოვმა აღნიშნეს, ფესტივალი ბათუმში, ე.წ. ანგისას სტადიონზე 17 და 18 ივლისს, 15:00 საათზე გაიმართება. ორდღიან ფესტივალზე დასწრების საფასური 80-100 ლარი იქნება.

პროექტში 15 ქვეყნის 17 როკ-ჯგუფი მიიღებს მონაწილეობას, მათ შორის "SEPULTURA" (ბრაზილია), "DARK TRANQUILLITY" (შვედეთი), Ken Hensley (URIAH HEEP), “METSATOLL" (ესტონეთი), "CEMETERY OF SCREAM" (პოლონეთი), "CARTHAGODS" (ტუნისი), "METAL SCENT" (ისრაელი), "W.H.I.T.E" (უკრაინა) და სხვა.

დროის სიმცირის გამო, ფესტივალში მონაწილეობის მიღებას მხოლოდ 4 ქართული როკ-ჯგუფი შეძლებს.

ორდღიან ღონისძიებაზე იგეგმება კემპინგი, რაც სტადიონის ტერიტორიაზე კარვებში ღამისთევას გულისხმობს. როკის ფანების ჩამოყვანაზე საზღვარგარეთიდან ფესტივალის ევროპელი პარტნიორები იზრუნებენ. ფესტივალს მხარს ბათუმის მერია უჭერს.

როგორც ~ინტერპრესნიუსს~ ბათუმის მერიის ახალგაზრდობის საქმეთა განყოფილების უფროსმა თამაზ დარჩიძემ განუცხადა, აჭარის რეგიონში უკვე მეხუთე წელია მსგავსი ღონისძიებები ტარდება.

წლევანდელი ~Global East Rock Festival 2011 Batumi Open Air~ ფესტივალიც თავისი მრავალფეროვნებით საინტერესო იქნება როკის მოყვარულებისთვის, რაც ბათუმში ტურისტების რაოდენობის გაზრდასაც შეუწყობს ხელს.

ვიდეო