აღმაშენებლის ხეივნიდან რობაქიძის გამზირზე გადასასვლელი გზის მონაკვეთი 4 თვით დაიკეტება
სარეკონსტრუქციო სამუშაოების გამო ხვალიდან 4 თვის განმავლობაში აღმაშენებლის ხეივნიდან რობაქიძის გამზირზე გადასასვლელი გზის მონაკვეთი დაიკეტება.
როგორც "ინტერპრესნიუსს" თბილისის მერიიდან აცნობეს, აღმაშენებლის ძეგლთან მისასვლელი გზა იკეტება, რადგან მიმდინარეობს აღმაშენებლის ძეგლთან არსებული გვირაბის გათხრითი სამუშაოები, რომელიც დაახლოებით 4 თვემდე გასტანს.
ქალაქიდან გასასვლელად, გელოვანის გამზირიდან დავით აღმაშენებლის ხეივნის მიმართულებით მოძრავი სატრანსპორტო საშუალებებისათვის აღმაშენებლის ძეგლამდე გაკეთდა პირდაპირი შემოვლითი გზა, რომელიც აღმაშენებლის ძეგლის გვერდის ავლით გელოვანის გამზირს რობაქიძის გამზირთან აკავშირებს. ამისათვის, ნებისმიერმა სატრანსპორტო საშუალებამ რობაქიძის გამზირი ხელმარცხნივ აღმაშენებლის ხეივნისკენ უნდა გადაკვეთოს.
"ყველა სატრანსპორტო საშუალებამ, მათ შორის ვინც ქალაქში შემოდის დასავლეთ საქართველოდან და რომელიც რობაქიძის გამზირის გავლით გადაადგილდებოდა დიდუბის ან მარცხენა სანაპიროს მიმართულებით, მშენებლობის პროცესში ალტერნატივად მინდელის ან ახმეტელის ქუჩა უნდა გამოიყენონ. ყველგან განთავსდება საინფორმაციო ბანერები და ავტოსატრანსპოტო საშუალებების მძღოლებს შესაძლებლობა ექნებათ, მათი საშუალებით სიახლეს გაეცნონ", _ აცხადებენ მერიაში.
