თბილისის მერია ტრამვაის სისტემის მშენებლობისთვის ტენდერს მომავალი წლის იანვარში გამოაცხადებს. როგორც "ინტერპრესნიუსს" ივანე ჯავახიშვილის სახელობის თბილისის სახელმწიფო უნივერსიტეტიდან აცნობეს, დღეს უნივერსიტეტში საინიციატივო ჯგუფი "თბილისის ტრამვაის" პრეზენტაციას გამართავს. პრეზენტაციას თბილისის საკრებულოს, მერიისა და ჩეხეთის საელჩოს წარმომადგენლები დაესწრებიან.

პრეზენტაციის მიზანია, საზოგადოებას გააცნოს სატრანსპორტო საშუალების – ტრამვაის უპირატესობები. პრეზენტაციაზე დაგეგმილია ტრამვაის სხვადასხვა წარმოების და მარკის ვაგონების განხილვა. წარმოდგენილი იქნება ჩეხური წარმოების ტრამვაის ვაგონების ფოტონიმუშები, რადგან ყველაზე დიდი რაოდენობით სხვადასხვა ქვეყანაში სწორედ ჩეხური წარმოების ტრამვაი ფუნქციონირებს.

თბილისის მერია ტრამვაის სისტემის მშენებლობისთვის ტენდერის გამოცხადებას მომავალი წლის იანვარში გეგმავს. მანამდე ფრანგული კომპანია "სისტრას" კვლევის შედეგად შეირჩევა თბილისის უბნები და რაიონები, რომლებიც ტრამვაის სისტემას საჭიროებენ.