პარტიებს კომერციული ბანკებიდან წლის განმავლობაში შესაძლოა მხოლოდ 100 000 ლარის ოდენობის სესხის ან კრედიტის აღების უფლება მიეცეთ.

პარტიების მიერ სესხის ან კრედიტის აღება "მოქალაქეთა პოლიტიკური გაერთიანებების შესახებ" კანონში ცვლილებების პროექტით რეგულირდება.

როგორც კანონპროექტის განმარტებით ბარათშია ნათქვამი, ევროსაბჭოს რეკომენდაციების თანახმად, დასარეგულირებელია პარტიის მიერ სესხის/კრედიტის მიღების საკითხი. ერთის მხრივ, პარტიის მიერ მიღებული კრედიტები საჭიროა სათანადოდ აღირიცხოს, ხოლო შეღავათიან პირობებში კრედიტის აღება აგრეთვე უნდა ჩაითვალოს შემოწირულობად. ასევე, კრედიტის მიღების უფლებამ არ უნდა მისცეს პარტიას შესაძლებლობა, გვერდი აუაროს შემოწირულობათა ზღვრულ ოდენობას.

კანონპროექტის ავტორები ამბობენ, რომ ევროკავშირის ქვეყნებში აღნიშნული საკითხი განსხვავებულად რეგულირდება. მაგალითად ლატვიაში, აკრძალულია პარტიის მიერ კრედიტის აღება, ხოლო პორტუგალია განეკუთვნება იმ სახელმწიფოთა ჯგუფს, სადაც კრედიტის აღება მხოლოდ საბანკო დაწესებულებათა მეშვეობითაა შესაძლებელი.

ქართული კანონმდებლობით კი, კანონპროექტის მიხედვით, პარტიას კრედიტის აღება შეეძლება მხოლოდ კომერციული ბანკისგან, დადგინდება კრედიტის მაქსიმალური ზღვარი წელიწადში 100 000 ლარის ოდენობით, ხოლო შეღავათიან პირობებში გაცემული კრედიტი, შემოწირულობად ჩაითვლება იმ ნაწილში, რაც განსხვავდება ბაზარზე არსებული საპროცენტო განაკვეთისა და სხვა ძირითადი პირობებისგან. ანალოგიური წესი გავრცელდება ფასდაკლებით (შეღავათიანი პირობებით) მიწოდებულ პროდუქციასა თუ მომსახურებაზე და შემოწირულობად ჩაითვლება.

კანონპროექტის ავტორები და ინიციატორები დეპუტატები პავლე კუბლაშვილი, აკაკი მინაშვილი და ჩიორა თაქთაქიშვილი არიან. პროექტი ვენეციის კომისიაში უკვე გაგზავნილია და მისი ინიცირება პარლამენტში პარასკევს მოხდება.