"გრინფისის მხარდამჭერთა ჯგუფმა კავკასიაში" და ნაძალადევის რაიონის მოსახლეობის წარმომადგენლებმა კიკვიძის ბაღის ტერიტორიაზე პოლიციის შენობის მშენებლობის დაწყება გააპროტესტეს. კიკვიძის ბაღთან, დასასვენებელი სკვერის ნაწილი უკვე შემოღობილია, სადაც, აქციის მონაწილეების ინფორმაციით, თანამედროვე სტანდარტების პოლიციის შენობა უნდა აშენდეს.

როგორც აქციის მონაწილეებმა "ინტერპრესნიუსს" განუცხადეს, რაიონში ეს ერთადერთი გამწვანების ადგილია და მას "ნაძალადევის ფილტვებსაც" უწოდებენ.

"გრინფისის" მხარდამჭერთა ჯგუფის წარმომადგენლის, ლაშა ჩხარტიშვილის განცხადებით, ხელისუფლება აღნიშნულ ტერიტორიაზე ათეულობით ხე-ნარგავის გაჩეხვას აპირებს, რაც დაუშვებელია.

"საგანგაშო ტენდენციად გადაიქცა ხელისუფლების მიერ თბილისში, ისედაც უაღრესად მცირე რაოდენობის ბაღ-პარკების გაჩეხვის ხარჯზე, პოლიციისა და გამგეობის შენობების მშენებლობა. ამ ტერიტორიაზე ასწლოვანი ხეები დგას და პოლიციის ახალ შენობას 70 ხე შეეწირება, რასაც ყველა ერთად უნდა აღვუდგეთ წინ", - განაცხადა ლაშა ჩხარტიშვილმა.

მისივე ინფორმაციით, კიკვიძის ბაღში ხეების გაჩეხვისა და იქ პოლიციის შენობის მშენებლობის საკითხთან დაკავშირებით პროტესტი უფრო მასშტაბური რომ იყოს, 21 თებერვალს, "გრინფისის" მხარდამჭერთა ჯგუფი და ნაძალადევის რაიონის მოსახლეობა საპროტესტო აქციას უკვე თბილისის მერიასთან გამართავს.