მარშალ გელოვანის გამზირის ბოლოდან დავით აღმაშენებლის ხეივნისკენ გასასვლელი საავტომობილო გვირაბი გაიხსნა .  კვანძის მოწყობა თბილისის მერიამ მოძრაობის განტვირთვის მიზნით დაგეგმა. როგორც მერიის სატრანსპორტო სამსახურში აცხადებენ, თბილისიდან გამავალი და ქალაქში შემომავალი ტრანსპორტის, ასევე რობაქიძის გამზირიდან მოძრავი სატრანსპორტო საშუალებების ნაკადის მკვეთრმა ზრდამ მოძრაობა საგრძნობლად გადატვირთა და შედეგად ტერიტორიაზე მუდმივად საცობები იქმნებოდა.

95 მეტრის სიგრძის ბეტონის გვირაბი საერთაშორისო სტანდარტების შესაბამისად აშენდა, დამონტაჟდა გარე განათების სისტემა და გვირაბის გარე პერიმეტრი გრანიტით მოპირკეთდა.

ახალი გვირაბის ექსპლუატაციაში შესვლის შემდეგ, დავით აღმაშენებლის ძეგლთან გაუქმდა შუქნიშანი, მოეწყო სატრანსპორტო კვანძი და შესაძლებელი გახდა მანქანების შეუჩერებლად გადაადგილება.

ამასთან, მიმდებარე ტერიტორიაზე მცხოვრები მოსახლეობის თხოვნის გათვალისწინებით, გზასთან ახლოს დასასავენებელი სკვერიც გაშენდა.

დღეს მარშალ გელოვანის გამზირზე აშენებულ გვირაბში გიგი უგულავამ ავტობუსით თბილისელებთან ერთად გაიარა და ახალი გვირაბი მათთან ერთად დაათვალიერა.