ენგურჰესი გაყიდული არ არის და ის საქართველოს საკუთრებაშია, - ამის შესახებ საქართველოს ენერგეტიკისა და ბუნებრივი რესურსების მინისტრმა კახა კალაძემ განაცხადა.

მისივე თქმით, ახალი ხელისუფლებისთვის მნიშვნელოვანია, რომ ჰესებთან დაკავშირებულ ხელშეკრულებებში საქართველოს ინტერესები დაცული იყოს.

"ჩვენთვის, როგორც ხელისუფლებისთვის, ძალიან მნიშვნელოვანია, რამდენად არის ამ ხელშეკრულებებში გატარებული საქართველოს ინტერესები. ისინი აუცილებლად გადაიხედება. მე მინდა, ჩვენი სამინისტრო იყოს გამჭვირვალე. ეს ყველაფერი იყოს საჯარო. რამდენიმე წლის წინ იყო საუბარი იმასთან დაკავშირებით, რომ თითქოს ენგურჰესი გაიყიდა. ეს სიმართლეს არ შეესაბამება. მინდა, გითხრათ, იყო რაღაც მოლაპარაკებები, მაგრამ ყველაფერი გაჩერებულია და ენგურჰესი საქართველოს საკუთრებაშია", - განაცხადა კალაძემ.

კალაძემ ეს განცხადება ტელეკომპანია "რუსთავი 2"-ის გადაცემა "პოსტ სკრიპტუმში" გააკეთა.