სწრაფი გადახდის აპარატებით სატელეფონო მომსახურების ბალანსის შევსების პირობები იცვლება. როგორც "ინტერპრესნიუსს" "მაგთიკომიდან" აცნობეს , მობილური ოპერატორების (მაგთიკომი, ჯეოსელი და ბილაინი) მომხმარებლები დღეიდან თავად გადაიხდიან ბალანსის შევსების საკომისიოს.

საკომისიოს ოდენობას ინდივიდუალურად განსაზღვრავს თითოეული სწრაფი გადახდის კომპანია. ამასთან, როგორც "მაგთიკომში" განმარტავენ, ანგარიშის შევსება საკომისიოს გადახდის გარეშე კვლავაც შესაძლებელი იქნება სხვა ალტერნატიული გადახდის საშუალებების გამოყენებისას (სასაუბრო ბარათები, ოპერატორების სერვის ცენტრები და ოპერატორების ვებ გვერდები).