ჯანდაცვის სამინისტროსა და პარლამენტის ჯანდაცვის კომიტეტს შორის დაწყებული კონფლიქტი საყოველთაო ჯანდაცვის პროგრამის განხორციელებას საფრთხეს შეუქმნის , - ამის შესახებ დღეს "პირველი რადიოს" პრესკლუბში "ქრისტიან-დემოკრატების" ერთ-ერთმა ლიდერმა მაგდა ანიკაშვილმა განაცხადა.

მისი თქმით, საყოველთაო ჯანდაცვის რეფორმის წარმატებით ჩატარებას სამედიცინო საზოგადოების დიდი მხარდაჭერა და მოქალაქეების ნდობა სჭირდება.

"ჯერჯერობით, საზოგადოება თვალს ადევნებს დაპირისპირებას ჯანდაცვის უმნიშვნელოვანეს პროექტზე პასუხისმგებელ ორ მთავარ უწყებას შორის, რაც პაციენტის დამაბნეველი და ექიმის დემოტივაციის ფაქტორი ხდება. დარგისთვის ყველაზე დიდი ზიანის მომტანი კი ჯანდაცვის სისტემის პოლიტიკური ბრძოლის იარაღად გამოყენებაა", - აცხადებს მაგდა ანიკაშვილი.

მისივე თქმით, აუცილებელია ჯანდაცვის სისტემასთან დაკავშირებით მაღალ დონეზე მოხდეს შეთანხმებული პოზიციის ჩამოყალიბება.

"საზოგადოებისათვის აუცილებელია, განსაკუთრებით მედიკოსების განმარტებების გაკეთება და მოსახლეობის მაქსიმალური ინფორმირება ჯანდაცვის სისტემაში მიმდინარე პროცესებთან დაკავშირებით", - განაცხადა მაგდა ანიკაშვილმა.