პრობაციის ეროვნული სააგენტოს დელეგაციის სამუშაო ვიზიტი ამერიკის შეერთებულ შტატებში დასრულდა. როგორც "ინტერპრესნიუსს" სააგენტოდან აცნობეს, ვიზიტის ფარგლებში, პრობაციის ეროვნული სააგენტოს უფროსი გიორგი არსოშვილი შეხვდა აშშ–ის პრობაციისა და სასჯელაღსრულების ასოციაციის პრეზიდენტს კარმენ როდრიგესს. შეხვედრის დროს განიხილეს პრობაციონერებს შორის რეციდივული დანაშაულის თავიდან აცილების საკითხები, აგრეთვე, პირობით მსჯავრდებულების რეაბილიტაციისა და რესოციალიზაციის ძირითადი ასპექტები.

როგორც გიორგი არსოშვილმა აღნიშნა, პრობაციის ეროვნული სააგენტო პრობაციონერების რეაბილიტაცია–რესოციალიზაციის საკითხებს უდიდეს მნიშვნელობას ანიჭებს. ამის დადასტურებას წარმოადგენს ისიც, რომ სააგენტოში მიმდინარე წელს შეიქმნა ახალი სტრუქტურული ერთეული, რომელიც სწორედ ამ მიმართულებით იმუშავებს.

ამერიკის შეერთებულ შტატებში გამართული სამუშაო ვიზიტის დროს, გიორგი არსოშვილმა და კარმენ როდრიგესმა ასევე განიხილეს სამომავლო თანამშრომლობის, ქართული მხარის მიერ დასავლური გამოცდილების გაზიარების და დანერგვის საკითხები.