გაეროს განიარაღების კომისიის ყოფილი წარმომადგენელი და საქართველოს ექსპრეზიდენტის ბიძა თემურ ალასანია უკრაინაში მის ჩასვლას მიხეილ სააკაშვილის უსაფრთხოებაზე ზრუნვის მიზეზით ხსნის.

"რამდენადაც გავიგე, საქართველოში მავანს არ მოსწონს ჩემი უკრაინაში ყოფნა. დავიწყებ იმით, რომ ეს მათი საქმე არ არის. მეორე, უკრაინაში ვიყავი იმიტომ, რომ წავყევი ჩემს დის შვილს. სხვათა შორის, ის მარტო დადის აქეთ-იქით. ნიუ-იორკში მეტროშიც კი მარტო დადის. მას სხვებისგან განსხვავებით არ აქვს იმის საშუალება, რომ გარშემორტყმულმა იაროს თანაშემწეებით, ამიტომ ყველაფერს რომ თავი დავანებოთ, ეს უსაფრთხოების საკითხიცაა - არ მინდოდა მარტო რომ ყოფილიყო. სხვათა შორის, წინა წასვლაზე ჩემი შვილი გავაყოლე – გიორგი. მიუხედავად იმისა, რას ამბობენ თბილისში, ჩვენ ვიმგზავრეთ ეკონომკლასით. ის ნიუ-იორკშიც ფეხით და მეტროთი დადის. მეორეც, მე მიყვარს უკრაინელი ხალხი და ჩემთვის სულერთი არაა მათი ბედი", - განაცხადა თემურ ალასანიამ გადაცემა "პოზიციაში" საუბრისას.

ამასთან, მისივე თქმით, მას აქვს შეკითხვა საქართველოს ხელისუფლების წარმომადგენლებთან, თავად რატომ არ იმყოფებოდნენ უკრაინაში. "საკითხი ასე კი არ უნდა იდგეს, რატომ ვიყავი მე უკრაინაში, არამედ ისინი სად იყვნენ, ვისაც ეს არ მოსწონს _ რატომ არ იყვნენ საქართველოს მთავრობის ან მმართველი პარტიის წარმომადგენლები. ნუთუ არ ესმით, რომ წყალგამყოფი პატიოსან და არაკეთილსინდისიერ პოლიტიკოსებს შორის, თავისუფალ ხალხსა და დაჩმორებულ, მონობისთვის გამზადებულ ერს შორის სწორედ დღეს გადის უკრაინის მოვლენების შეფასებაზე და უკრაინელი ხალხის სრულიად ობიექტური და დემოკრატიული მხარდაჭერის მისწრაფებაზე", - აღნიშნა ალასანიამ.