სამხრეთ აფრიკულ პინგვინებს თბილისში, სავარაუდოდ, მაისის ბოლოს ჩამოიყვანენ. ამის შესახებ "ინტერპრესნიუსის" ეკონომიკური დამატება BPN.ge- სთან საუბრისას თბილისის ზოოპარკის დირექტორმა, ზურაბ გურიელიძემ განაცხადა.

მისი თქმით, ეს არის უპრეცედენტო შეთხვევა, რადგან საქართველოს ზოოპარკში პინგვინი არასდროს ჰყოლიათ.

20 პინგვინს ინგლისიდან ჩამოიყვანენ. გურიელიძის განმარტებით, "თავისუფალი მიმოსვლის პროგრამის" ფარგლებში, აღნიშნული პინგვინები ინგლისურმა ზოოპარკმა სრულიად უანგაროდ გადმოგვცა.

თბილისის ზოოპარკის დირექტორი ვარაუდობს, რომ პინგვინების ჩამოყვანა ზოოპარკისთვის კომერიციული თვალსაზრისით საკმაოდ მომგებიანი იქნება.

"მას შემდეგ, რაც ეს ინფორმაცია გავრცელდა, ყოველდღე უამრავი ადამიანი მირეკავს და მეკითხება, როდის შეძლებენ ზოოპარკში პინგვინების ნახვას. რადგან ასეთი ინტერესია, ვფიქრობ, პინგვინების სანახავად ზოოპარკში ბევრი ადამიანი მოვა, რაც ზოოპარკის მოგებას გაზრდის", - განაცხადა გურიელიძემ.

შეკითხვაზე, გამოიწვევს თუ არა პინგვინარიუმის გახსნა, ზოოპარკის ბილეთის ფასის ზრდას, გურიელიძემ განაცხადა, რომ ჯერჯერობით ბილეთის ღირებულება იგივე დარჩება.

რაც შეეხება 20 პინგვინის მოვლის ხარჯებს, გურიელიძის თქმით, ხარჯები დათვლილია და წლის განმავლობაში პინგვინების შენახვა იმაზე ძვირი არ დაჯდება, რაც სხვა ცხოველების მოვლაზე იხარჯება.

სამხრეთ აფრიკული პინგვინი გადაშენების პირას მყოფ წყალქვეშა ცხოველთა რიცხვშია. პინგვინის ეს სახეობა ასევე ცნობილია, როგორც ვირ-პინგვინა, რადგან მათი ხმა, წამოძახილი ძალიან ჰგავს ვირის ყროყინს. იგი მხოლოდ და მხოლოდ აფრიკაში, ნამიბიის სახელმწიფოსთან ახლოს ბინადრობს.