სომხეთის ქალაქ გიუმრის მერის სამველ ბალასანიანის განცხადებით, 12 იანვარს მომხდარი მკვლელობის შემდეგ, არ არსებობს იმის აუცილებლობა, რომ ქალაქი რუსეთის 102-ე სამხედრო ბაზამ დატოვოს.

"ნიუს.ამ"-ის ინფორმაციით, მერმა ხაზგასმით აღნიშნა, რომ დამნაშავეს ეროვნება და აღმსარებლობა არ გააჩნია და არ არის აუცილებელი რუსეთ-სომხეთის ურთიერთობებში დაძაბულობის შეტანა.

"რუსები აქ მრავალი წელია არიან. როგორც მერი, არ მივიჩნევ ამ საკითხის გადახედვის აუცილებლობას. ჩადენილია დანაშაული. არ არის საჭირო ერთი-ორი ინციდენტის გამო რუსეთ-სომხეთის ურთიერთობაში დაპირისპირება", - განაცხადა ბალასანიანმა.

მისი თქმით, მას და ქალაქის მცხოვრებლებს ერთადერთი მოთხოვნა აქვთ - დამნაშავე სომხეთში დარჩეს და ადგილობრივი მართლმსაჯულებით გასამართლდეს.