არქიმანდრიტ ილია კარტოზიას ცხედარი სამების საკათედრო ტაძარშია დასვენებული. როგორც მიტროპოლიტმა გერასიმე შარაშენიძემ ჟურნალისტებს განუცხადა, მამა ილია კარტოზიას ცხედარს დღეს, წირვის შემდეგ სამების საკათედრო ტაძრიდან სვეტიცხოველში გადაასვენებენ, ხოლო 20 იანვარს წმინდა დავით აღმაშენებლის სახელობის ტაძარში გადაასვენებენ და ამავე მონასტრის ეზოში დაკრძალავენ.
ადრიატიკის ზღვაში დაღუპული არქიმანდრიტი ილია კარტოზია თბილისში გუშინ, მეუფე გერასიმემ და გარდაცვლილის ძმამ ჩამოასვენეს. აეროპორტში მამა ილიას ცხედარს სასულიერო პირები, მრევლი და ახლობლები დახვდნენ. პროცესიას მგალობელთა ჯგუფი გალობით დახვდა. მამა ილია აეროპორტიდან სამების ტაძარში გადაასვენეს.
სამებაში ცხედარს სრულიად საქართველოს კათოლიკოს-პატრიარქმა ილია მეორემ ნაკურთხი წყალი ასხურა, რის შემდეგაც გარდაცვლილი სასულიერო პირის სასახლესთან უკვე მოქალაქეები მიდიოდნენ და მას პატივს მიაგებდნენ. ტაძარში შესრულდა პანაშვიდიც.
ადრიატიკის ზღვაში ბორან "ნორმან ატლანტიკზე" 28 დეკემბერს ხანძარი გაჩნდა. გემზე 500-მდე ადამიანი იმყოფებოდა. მათ შორის იყო საქართველოს რვა მოქალაქე. მამა ილიას გარდა ყველა მათგანი ცოცხალია და უვნებელი გადარჩა. მამა ილია კარტოზია მცხეთის მამათა მონასტრის წინამძღვარი იყო.
იხილეთ ვიდეო: ემოციური კადრები: არქიმანდრიტ ილია კარტოზიას ჩამოსვენება თბილისში