საქართველოს პრეზიდენტი გიორგი მარგველაშვილი ელის, რომ პარლამენტი უზენაესი სასამართლოს თავმჯდომარის თანამდებობაზე ნინო გვენეტაძის კანდიდატურას პირველივე რაუნდში დაუჭერს მხარს. პრეზიდენტი იმედოვნებს, რომ გადაწყვეტილება ძალიან მაღალი კონსენსუსით იქნება მიღებული.

"მე პარლამენტისგან ველი დადებით გადაწყვეტას. იმედი მაქვს, ეს იქნება ძალიან მაღალი კონსენსუსით მიღებული გადაწყვეტილება. რატომ არის მნიშვნელოვანი, რომ პირველივე რაუნდზე გავიდეს კანდიდატი?! იმისთვის, რომ სასამართლოს ჰყავდეს ძლიერი მანდატის თავმჯდომარე, დროზე დაიწყოს რეფორმები და სასამართლოს ნდობის იმპულსი აღდგეს", - განაცხადა საზოგადოებრივი მაუწყებლის ეთერში მარგველაშვილმა.

მისივე თქმით, ნინო გვენეტაძე მართლმსაჯულების და სასამართლო სისტემის დაცვის სიმბოლოა. "ჩვენ გამოვედით 4 კრიტერიუმით, რომელთა შესახებ ყველა შეთანხმდა. ამ ღია პროცესის შედეგად, ამ 4 კრიტერიუმის საფუძველზე გავიარეთ ყველა კანდიდატის შეხედულებები. ამ დიდი შრომის შედეგად, რომელიც განახორციელა ჩემმა გუნდმა, მივიღე გადაწყვეტილება ნინო გვენეტაძის დასახელების შესახებ. მისი კანდიდატურა გამყარებულია ბევრი არგუმენტით. ის არის სიმბოლო მართლმსაჯულების და სასამართლო სისტემის დაცვის. ეს არის ადამიანი, რომელმაც თავისი ცხოვრების გზა განვლო ისე, რომ გახდა ჩვენი საზოგადოებისთვის სამართლიანობის სიმბოლო", - განაცხადა პრეზიდენტმა.