რეზო ჩხეიძე მაქსიმალურად ცდილობდა ორი ქვეყნის - საქართველოსა და რუსეთის დაახლოებას. "რია ნოვოსტის" ინფორმაციით, ამის შესახებ რუსეთის კულტურის მინისტრმა ვლადიმერ მედინსკიმ განაცხადა.

მედინსკიმ რეზო ჩხეიძეს ნიჭიერი რეჟისორი და შესანიშნავი ადამიანი უწოდა. "მან კინემატოგრაფიას ნახევარ საუკუნეზე მეტი დაუთმო და შექმნა გულწრფელი, ადამიანური და ღრმა შინაარსის ფილმები, რომელთაგან ერთ-ერთია "ჯარისკაცის მამა", რომელიც აუცილებლად უნდა ნახოს ყველა ჩვენგანმა", - განაცხადა რუსეთის კულტურის მინისტრმა.

მისივე თქმით, რეზო ჩხეიძის შვილობილი იყო სტუდია "ქართული ფილმი", რომლის შენარჩუნებასა და განვითარებაში მან უამრავი წლის განმავლობაში მთელი თავისი ძალები და შესაძლებლობები ჩადო. "საბჭოთა კავშირში დაბადებული რეზო ჩხეიძე თავის შემოქმედებას ერთიან ხალხს ჩუქნიდა და ცდილობდა მაქსიმალურად დაეახლოვებინა ორი ქვეყანა", - განაცხადა მედინსკიმ.

რეზო ჩხეიძე გუშინ 89 წლის ასაკში გარდაიცვალა.