ლაგუნა-ვერეს მიმდებარე ტერიტორიაზე ვეფხვის თავდასხმის შედეგად გარდაცვლილი ოთარ ცუხიშვილი მარნეულში გადაასვენეს. 43 წლის ოთარ ცუხიშვილი ამ დროისათვის სოფელ წერეთელში მშობლებისა და ძმის სახლშია გადასვენებული, მას სოფლის სასაფლაოზე მშობლების გვერდით დაკრძალავენ.
ოთარ ცუხიშვილი გუშინ ლაგუნა-ვერეს მიმდებარე ტერიტორიაზე ერთ-ერთ საწყობში გაწმენდით სამუშაოებში იღებდა მონაწილეობას, რა დროსაც მას ვეფხვი დაესხა თავს.
ვეფხვის თავდასხმის შედეგად გარდაცვლილი ოთარ ცუხიშვილის ოჯახს მთავრობის გადაწყვეტილებით ფულადი კომპენსაცია გადაეცემა, სარიტუალო მომსახურებას კი თავის თავზე თბილისის მერია აიღებს.
ოთარ ცუხიშვილი მარნეულის მუნიციპალიტეტის სოფელ წერეთლიდან იყო. ის მეზობლების თქმით, ბოლო 4 წელია თბილისში ორხევის დასახლებაში დის ოჯახთან ერთად ცხოვრობდა. ცუხიშვილის მეუღლე თურქეთში სამუშაოდ იმყოფება, მათ შვილები არ ჰყავდათ.