საჩხერის რაიონის გამგებლის, მალხაზ ბაზაძის ინფორმაციით, სოფელ კვერეთში მდებარე საწერეთლო საძვალის დასუფთავება იგეგმება.

როგორც "ინტერპრესნიუსს" მალხაზ ბაზაძემ განუცხადა, გამგეობა ამინდის გაუმჯობესებისთანავე სასაფლაოს მოწესრიგებას გეგმავს.

"ჩვენ ვგეგმავთ ღონისძიებას, აქციას. გზა ცოტა მიუვალია, ტექნიკა ვერ შეგვყავს, ფეხით უნდა მივიდეთ. თან ცუდი ამინდი, წვიმა იყო. როგორც კი გამოიდარებს და ნორმალური ამინდები გამოვა, დაგეგმილი გვაქვს აქცია და გასუფთავება", - აღნიშნა მალხაზ ბაზაძემ.

ადგილობრივების ინფორმაციით, საჩხერის რაიონის სოფელ კვერეთში საწერეთლო საძვალე მოუვლელია. როგორც "ინტერპრესნიუსს" საჩხერის ერთ-ერთმა მკვიდრმა განუცხადა, საწერეთლო საძვალეში დაკრძალულია 12 წერეთელი - აკაკი წერეთლის დედ-მამა, მამიდა, ბიცოლა, სანათესაო. მისივე ინფორმაციით, სასაფლაო შემოღობილი არ არის, მიტოვებულია, ტერიტორია ეკალ-ბარდებით არის სავსე. საძვალეზე საქონელი, ღორები დადიან.

2015 წელს დიდი ქართველი მწერლის, აკაკი წერეთლის დაბადებიდან 175-ე და გარდაცვალებიდან მე-100 წლისთავი სრულდება.