პარიზის გარეუბანში ანტიტერორისტული ოპერაციის დროს სამართალდამცველი დაიჭრა

პარიზის სან-დენის გარეუბანში, სადაც ანტიტერორისტული ოპერაცია ტარდება, ამ დროისთვის სროლის ხმა შეწყდა. როგორც მედია იტყობინება, დაჭრილია სულ მცირე ერთი სამართალდამცველი. "ბიბისის" კორესპონდენტი ადგილიდან იტყობინება, რომ სან-დენიში აფეთქებებისა და ინტენსიური სროლის ხმა ისმოდა.

ადგილზე მომუშავე ფრანგი ჟურნალისტები იტყობინებიან, რომ რამდენიმე ადამიანი ერთ-ერთ ბინაში ჩაიკეტა და ბარიკადები აღმართა. სააგენტო "ესოშიეითედ პრესი" წერს, რომ რეიდი პარიზის ტერაქტებთან კავშირში მყოფი მთავარი ეჭვმიტანილის აბდელჰამიდ აბაუდის წინააღმდეგაა მიმართული.

ანტიტერორისტული ოპერაციის ფარგლებში, რაიონში მცხოვრებ მოსახლეობას სახლებში დარჩენა ურჩიეს, ნაწილი ევაკუირებულია.