დიდუბის რაიონის გამგეობის ორგანიზებით, წინასაახალწლო კულტურულ-სპორტული ღონისძიება "ნიჭიერი თოვლის ბაბუები" გაიმართა.

როგორც "ინტერპრესნიუსს" თბილისის მერიიდან აცნობეს, დიდუბის რაიონში მდებარე სხვადასხვა სკოლის მოსწავლეები თოვლის ბაბუის ფორმებში იყვნენ წარმოდგენილნი და ერთმანეთს შეეჯიბრნენ სპორტის რამდენიმე სახეობაში, მათ შორის, ბაგირის გადაწევაში, სპრინტში, ჭადრაკსა და მკლავჭიდში.

ღონისძიების მონაწილეები ერთმანეთს ცეკვაში, სიმღერაში, მხატვრულ კითხვასა და ორიგინალურ პერფორმანსშიც შეეჯიბრნენ.

"თოვლის ბაბუებმა" მოქალაქეებს საახალწლო მისალოცი ბარათები დაურიგეს და დამდეგი შობა-ახალი წელი მიულოცეს.

კულტურულ-სპორტული ღონისძიების გამარჯვებულებმა დიდუბის რაიონის გამგეობისგან სპეციალური სიგელები და სამახსოვრო საჩუქრები მიიღეს.