საქართველოს განათლებისა და მეცნიერების მინისტრი თამარ სანიკიძე დღეს თბილისის 65-ე საჯარო სკოლას ეწვია და დასრულებული სარემონტო სამუშაოები დაათვალიერა.

როგორც "ინტერპრესნიუსს" განათლებისა და მეცნიერების სამინისტროდან აცნობეს, წლების მანძილზე ამ სკოლის ინფრასტრუქტურა სრულიად მოშლილი იყო, რის გამოც, მოსწავლეთა რაოდენობა 800-დან 300-მდე შემცირდა. დღეს სკოლა თითქმის სრულადაა რეაბილიტირებული, გარემონტდა საკლასო ოთახები, დერეფნები, გამოიცვლა გარე ვიტრაჟები, საევაკუაციო კარებები, განახლდა სველი წერტილები, გაკეთდა თანამედროვე გათბობის სისტემა. საქართველოს მასშტაბით 500-მდე საჯარო სკოლაში უკვე დასრულდა სხვადასხვა ტიპის ფართომასშტაბიანი სარეაბილიტაციო სამუშაოები, 100-მდე სკოლაში კი, ამ ეტაპზეც მიმდინარეობს.