თუკი დავით ზალკალიანი კმაყოფილია ამ სასამართლოთი და ამ პროკურატურით, ღმერთმა ხელი მოუმართოს, - ასე აფასებს "თავისუფალი დემოკრატების" ერთ-ერთი ლიდერი, მაია ფანჯიკიძე დავით ზალკალიანის მინისტრის პირველი მოადგილის პოსტზე დაბრუნებას.

როგორც ფანჯიკიძემ "ინტერპრესნიუსს" შესაბამისი კითხვის საპასუხოდ განუცხადა, ზალკალიანის გადაწყვეტილება მისთვის მოულოდნელი იყო.

"ზალკალიანი ფაქტობრივად ერთი წლის წინ გავიდა პარტიიდან, 6 თვის წინ ეს გადაწყვეტილება ოფიციალურად გააფორმა, შესაბამისად, ეს იყო მისი პირადი გადაწყვეტილება, რომელსაც პარტიასთან არანაირი კავშირი არ აქვს. ჩემთვის ეს მაინც მოულოდნელი იყო, რადგან მან თავისი დაბრუნება "ქართულ ოცნებაში" ახსნა იმით, რომ ყველა კითხვაზე მიიღო პასუხი. მე კი ამ კითხვებზე პასუხი ჯერ არ მაქვს, რადგან მიმაჩნია, რომ იმ სასამართლოს, იმ პროკურატურის, იმ მედიის თავისუფლების ფონზე რაც დღეს არის საქართველოიში, ევროპული სახელმწიფოს მშენებლობა არის საფრთხის ქვეშ. თუკი ზალკალიანი კმაყოფილია ამ სასამართლოთი და ამ პროკურატურით, ღმერთმა ხელი მოუმართოს", - განაცხადა ფანჯიკიძემ.